Kryetari i Sindikatës së Sektorit Privat të Kosovës, Jusuf Azemi, është i mendimit se punëtorët e këtij sektori janë duke u diskriminuar nga Qeveria e Kosovës.
Në një konferencë për media, Azemi ka thënë se punëtorët e sektorit privat vazhdimisht po e lënë Kosovën.
Sipas tij, ndërmjet viteve 2020-2021, nga Kosova kanë ikur 92 mijë punëtorë me leje pune.
Tutje, Azemi tha se kërkesa e Sindikatës është rritja e pagës minimale në 450 euro.
“Kërkesa jonë është që paga minimale të jetë 450 euro. E kemi një pagë minimale që ne mendojmë qe duhet të zyrtarizohet nga Qeveria. Kanë premtuar por nuk e kanë realizuar”, ka thënë ai.
Azemi tha se me vendimin për vlerën e koeficientit prej 105 eurosh janë stimuluar punëtorët që kanë paga prej 700-800 euro, e jo ata që kanë paga 200 euro.
“Ne u goditem haptazi nga pakoja e luftimit të inflacionit, Qeveria duke e ditur që punëtorët e sektorit kanë 3 herë paga më të vogla, ndau mjete për ata të sektorit publik dhe jo ata privat, punëtorët janë shumë të zhgënjyer, ne na qiti në cilësinë e lëmoshës, është stimuluar punëtori që merr 700- 800 euro paga e jo ai që merr 200 euro”, ka thënë Azemi.
Ai ka kërkuar nga Qeveria e Kosovës të ndihmohet edhe sektori privat, sepse, siç tha ai, buxheti i Kosovës u takon të gjithëve, e jo vetëm sektorit publik.