Vajza 10-vjeçare e cila u plagos rëndë nga babai i saj mëngjesin e sotëm në Prizren, ndodhet jashtë rrezikut për jetë dhe gjendja e saj është stabile.
Lajmin e ka bërë të ditur Naser Syla, shef i Emergjencës në QKUK, për Dukagjinin.
“Gjendja e saj tani është stabile, po trajtohet këtu tek ne. Po kryhen të gjitha ekzaminimet”, ka theksuar Syla.
Ngjarja e rëndë ndodhi rreth orës 06:00 në rrugën “Shote Galica” në Prizren, ku një burrë turk dyshohet se ka therur për vdekje vajzën e tij 15-vjeçare, ka plagosur gruan dhe vajzën tjetër 10-vjeçare, e cila u dërgua në QKUK në gjendje të rëndë.
Sipas mjekëve, gjendja e saj është stabilizuar.
I dyshuari, 43-vjeçar, është arrestuar nga policia dhe aktualisht po trajtohet në Spitalin Rajonal të Prizrenit, pasi ka lënduar edhe veten.