Ish-zëvendësministri,Bajram Gecaj ka deklaruar përkrahjen e tij për kandidaturën e Ruzhdi Shehut për kryetar të Komunës së Junikut.
Me anë të një postimi në Facebook, ai e ka cilësuar atë si një vizionar që i ka dhënë jetë komunës.
“Në këto katër vite, ai e ktheu Junikun nga një qytezë me mundësi të hapura, në një komunë moderne, me infrastrukturë, zhvillim dhe perspektivë. Me një buxhet modest prej vetëm gjysmë milioni eurosh në vit për investime kapitale, Ruzhdi Shehu arriti të sjellë projekte mbi 10 milionë euro, falë bashkëpunimit me partnerë vendorë e ndërkombëtarë. Për më tepër, siguroi edhe një investim madhor: një park solar prej 42 milionë eurosh – një hap i madh strategjik për zhvillimin e qëndrueshëm të Junikut, por jo vetëm. Por, përtej shifrave e projekteve, ajo që e bën Ruzhdiun të veçantë është stili i tij i qeverisjes: pa skandale, me integritet të plotë, transparencë dhe me respekt për qytetarin. Për këtë arsye, edhe kundërshtarët e tij politikë e kanë të vështirë të mohojnë punën që ai ka bërë”, ka shkruar ai.
Sipas Gecajt, qeverisja e Shehut u karakterizua siç i ka hije një kryetari, pa skandale e me transparencë.
Mes të tjerash, ai shprehet i bindur në fitoren e Shehut.
“Unë nuk kam asnjë dyshim: Juniku këtë herë nuk ka nevojë për balotazh. Kryetari i ardhshëm do të jetë i njëjti që e ringriti dhe e bëri me shpresë – Ruzhdi Shehu. Vota për Ruzhdën është votë edhe për mua!”, ka shkruar ai.