Deputetja e Lidhjes Demokratike të Kosovës (LDK), Hykmete Bajrami, në seancën e së enjtes në Kuvend ka reaguar edhe për arrestimin e drejtorit të KEK-ut, duke thënë se ky rast është maja e “Icebergut”.
Ajo ka thënë se është shqetësuese që reagimet e deputetëve të Lëvizjes Vetëvendosje kanë qenë kundër organit që bëri akuzën ende pa u hetuar rasti në tërësi.
“Ajo që është më shqetësuese janë reagimet e deputetëve të VV-së kundër organit të akuzës. A mund të na tregoni pse e keni gjithë këtë frikë sa herë organet hetojnë korrupsionin. Ju që e keni gojën krejt drejtësi e keni humbur kredibilitetin për çfarëdo reforme. Ju po mendoni që drejtësia ndahet sipas përkatësisë politike. Në emër të LDK-së ju them se ne nuk do ta lëmë drejtësinë në duart tuaja, se ju vetëm drejtësi nuk mund të bëni”, i është drejtuar Bajrami Qeverisë.
Ndryshe, të mërkurën, zëdhënësi i Prokurorisë Speciale të Republikës së Kosovës, Ekrem Lutfiu, ka njoftuar se drejtori i KEK-ut, Nagip Krasniqi, është arrestuar nga Prokuroria Speciale nën dyshimin për keqpërdorim të pozitës zyrtare.