Kampioni i Kosovës e nis sot fazën finale për kualifikim në grupet e Ligës së Konferencës, duke qenë nikoqir i ekipit të njohur bjellorus.
Ballkani e pret BATE Borisovin në ndeshjen e parë të “Play-Off”-it, në takimin që pritet të zhvillohet në stadiumin “Fadil Vokrri” me fillim nga ora 20:45.
Ekipi i Ilir Dajës është përgatitur maksimalisht për këtë sfidë dhe është i kompletuar drejt arritjes së një rezultati pozitiv.
Në portë do të jetë i përhershmi Enea Koliqi, ashtu sikurse edhe mbrojta që nuk pritet të ndryshoj me Armend Thaqin e rikthyer në krahun e djathtë, Lumbardh Dellova dhe Bajram Jashanica në qendër dhe Lorenc Trashi në të majtë.
Në mesfushë do të jetë kapiteni Edvic Kuc së bashku me Vesel Limajn, i cili zëvendëson Qëndrim Zybën që nuk është ende i gatshëm qind për qind, ndërsa para tyre do të jenë Meriton Korenica, Almir Kryeziu dhe Nazmi Gripshi.
I vetëm në maje të sulmit pritet të jetë Albin Berisha.
Ndeshja kthyese zhvillohet pas një jave, më saktë më 31 gusht.
Ndryshe, ekipi i Ballkanit sot ka konfirmuar edhe transferimin e ri të sulmuesit Arb Manaj.