Pikët e plota kanë mbetur në Suharekë.
Ballkani ka triumfuar 1-0 ndaj Dritës, në kuadër të derbit të javës së 12-të në Superligën e Kosovës.
Golin e vetëm në këtë takim e shënoi Lumbardh Dellova pas një supergoditje nga largësia.
Ky gol ishte edhe një dëshmi e formës së lartë që po kalon qëndërmbrojtësi.
Në anën tjetër, Drita u mundua me të gjitha forcat për të barazuar, por përkundër mundësive qëllimin nuk e arriti.
Pas kësaj ndeshje, skuadra e udhëhequr nga Ilir Daja ngritet në kuotën e 29 pikëve, shtatë më shumë se Drita.
Fitore ka shënuar edhe Malisheva, pasi e mposhti Prishtinën 1-0.
Golin e vetëm për vendësit që ishte i vlefshëm për tre pikë e shënoi Ilir Mustafa, nga penaltia.
Të dyja skuadrat tani kanë nga 16 pikë, por Malisheva është e katërta, kurse Prishtina e pesta në tabelë.
Te fitorja është rikthyer SC Gjilani, sepse e mposhti Feronikelin 74 me rezultat 2-1.
Redon Ismaili dhe Milev e tundën rrjetën për vendësit dhe festa shpërtheu në Gjilan.
Në anën tjetër, golin e nderit për Niklin e realizoi Alban Shillova, gati në fund të takimit.
Gjilani tashmë është ngritur në pozitën e gjashtë me 14 pikë, kurse Feronikeli është në pozitën e tetë me 11 sosh, vend ky që shpien në ndeshjen e barazhit.