Presidentja e Komisionit Evropian, Ursula von der Leyen, ka deklaruar se Bashkimi Evropian “është i gatshëm të diskutojë” për çmimin tavan në importet e gazit.
Kjo për të shmangur rritjen e madhe të çmimeve të energjisë.
Në një fjalim në Parlamentin Evropian në Strasburg, shefja ekzekutive e BE-së ka thënë se do të përcaktojë një udhërrëfyes në një letër drejtuar liderëve që do të mblidhen në Pragë nga e enjtja.
“Ne jemi të gatshëm të diskutojmë një çmim tavan të gazit që përdoret për prodhim të rrymës”, ka thënë von der Leyen nga Straburgu, teksa shton se “ky çmim tavan do të shënonte hapin e parë në rrugën e reformave strukturore dhe reformave të përgjithshme në tregun e energjisë”, shkruan Reuters.
Von der Leyen shtoi se BE-ja duhej të sigurohej që anëtarët individualë të mos e tejkalojnë njëri-tjetrin për gaz në tregjet botërore dhe të rrisin çmimet.
“Është një zgjidhje e përkohshme derisa të zhvillohet një indeks i ri i çmimeve të BE-së që siguron një funksionim më të mirë të tregut. Komisioni ka nisur punën për këtë”, ka thënë ajo.
Po ashtu, ajo ka thënë se BE-ja duhet të përshpejtojë negociatat e saj me partnerë të besuar dhe të shikojë prokurimin e përbashkët, duke filluar me gazin e përdorur për të prodhuar energji elektrike.
Von der Leyen shtoi se kriza e energjisë kërkon masa të jashtëzakonshme, por ishte thelbësore që BE-ja të ruante një fushë loje të barabartë.
Komentet e saj para Parlamentit Evropian kanë dhënë shenja të ndryshimit të tonit në kontinentin evropian, pasi Gjermania ka shprehur shqetësime se vendosja e çmimeve tavan mund të devijojë furnizimet në Evropë.
Komisioni ka thënë se është në bisedime me Gjermaninë për paketën e saj të mbështetjes prej 200 miliardë eurosh (198.8 miliardë dollarë) që kritikët thonë se kërcënon të shtrembërojë konkurrencën në bllok.