Presidenti i Shqipërisë, Bajram Begaj, në kuadër të pritjes tradicionale të përfaqësuesve të Trupit Diplomatik në Shqipëri, të mërkurën ka shprehur mbështetjen për dialogun Kosovë-Serbi, duke thënë se nuk ka harruar kush është agresori dhe kë ka agresuar.
“Ne mbështesim fort dialogun Kosovë-Serbi, por nuk kemi harruar kush është agresori dhe kë ka agresuar”, ka deklaruar Begaj.
Sipas Begajt, është e udhës për Qeverinë që e ka përgjegjësinë historike të kërkojë ndjesën e agresionit dhe të jetë e para në tryezën e dialogut.
“Shqipëria do të jetë e ndjeshme, por e matur, në mbështetje të dialogut, por shumë e kujdesshme ndaj integritetit të shtetit kosovar”, ka vijuar ai.
Ndër të tjera, Begaj në këtë ceremoni ka ritheksuar qëndrimin se Shqipëria mbetet vendosmërisht në krah të ukrainasve e aktivisht pjesë e bashkëpunëtore e aleancës euroatlantike.
“Duke folur në emër të qytetarëve të vendit, si President i Republikës shpreha bindjen kombëtare në paqe, dialog, demokraci, shtetin e së drejtës e vlerat ballkanike dhe evropiane. Në këtë kuptim, shqiptarët do të mbeten faktor paqeje në Ballkan dhe promovues të imazhit të një Ballkani pasional, por jo konfliktual”.
I pari i Shqipërisë ka ftuar përfaqësuesit e trupit diplomatik që të jenë bashkudhëtarë në ndërtimin e një bote pa paragjykime, duke uruar që në vitin 2023 politika e jashtme të jetë rezultat i një ndërgjegjeje rajonale dhe globale.