Presidenti i Shqipërisë, Bajram Begaj, në takim me kryeministrin e Greqisë, Kyriakos Mitsotakis, i ka kërkuar që shteti i tij ta njohë Kosovën, duke theksuar se njohja e pavarësisë së Kosovës do t’i shërbente forcimit të sigurisë dhe paqes në rajon.
“Kosova është një realitet politik dhe njohja e pavarësisë së saj do t’i shërbente forcimit të mëtejshëm të paqes dhe sigurisë në rajonin e Ballkanit Perëndimor”, ka thënë Begaj.
Po ashtu, ai i ka vlerësuar marrëdhëniet shumë të mira dhe partneritetin strategjik midis dy vendeve dhe ka shprehur mirënjohjen për mbështetjen që Greqia dhe populli grek i kanë dhënë shqiptarëve në momentet e vështira pas ndryshimeve demokratike, por edhe në kuadër të përballimit të fatkeqësive të ndryshme natyrore.
Duke iu referuar fqinjësisë së mirë dhe vlerave e sfidave të përbashkëta, Begaj ka thënë se prania e minoritetit grek në Shqipëri dhe të komunitetit shqiptar në Greqi është vlerë e shtuar për këto marrëdhënie.
“Ato përbëjnë një urë të fortë, të vërtetë e të sinqertë miqësie e bashkëpunimi, për të cilën, ne jemi të gatshëm ta forcojmë e promovojmë më tej”, ka theksuar Begaj.
Presidenti Begaj dhe kryeministri Mitsotakis e vunë theksin edhe te bashkëpunimi ekonomik midis dy vendeve dhe mundësitë e investimeve të kapitalit grek në fusha të ndryshme të ekonomisë.