Zhvillimet në rajonin e Ballkanit Perëndimor ishin qendra e diskutimit të takimit të Zëvendës Ndihmës Sekretarit amerikan të Shtetit për Evropën dhe Euroazinë dhe njëherit, të dërguarit të posaçëm për Ballkanin Perëndimor, Gabriel Escobar, me Presidentin e Shqipërisë, Bajram Begaj.
Presidenti Begaj ka vlerësuar mbështetjen që Shtetet e Bashkuara dhe Escobar, i kanë dhënë procesit të negociatave mes Kosovës dhe Serbisë të ndërmjetësuar nga Bashkimi Evropian.
“Me Zëvendës Ndihmës Sekretarin amerikan të Shtetit njëkohësisht dhe të dërguarin e posaçëm për Ballkanin Perëndimor, Gabriel Escobar, rikonfirmuam pozicionet e palëkundura të dy vendeve tona, për të ardhmen euroatlantike të Ballkanit Perëndimor. Vlerësova partneritetin strategjik mes Shqipërisë dhe SHBA-ve, si dhe shpreha mirënjohjen për kontributin e SHBA-së në rritjen e kapaciteteve kibernetike të Shqipërisë. Nënvizova rolin e paçmuar që Shtetet e Bashkuara dhe Escobar kanë luajtur në procesin e negociatave Kosovë-Serbi”, ka shkruar Begaj.