Presidenti i Shqipërisë, Bajram Begaj, ka shprehur kënaqësinë e tij për mbajtjen e Samitit të Procesit të Berlinit, duke e vlerësuar si një hap të rëndësishëm në rrugëtimin e Shqipërisë dhe rajonit drejt anëtarësimit në Bashkimin Evropian.
“Mbajtja në Tiranë sot e Samitit të Procesit të Berlinit është një ngjarje e madhe historike për rrugëtimin evropian të Shqipërisë dhe rajonit. I uroj mirëseardhjen dhe punime të mbara delegacioneve pjesëmarrëse”, ka deklaruar ai në një postim në Facebook.
Tashmë, kryeministri i Kosovës, Albin Kurti, ka udhëtuar drejt Tiranës për të marrë pjesë në Samitin e Procesit të Berlinit.
Në këtë samit, pritet të diskutohen temat e ndryshme që kanë të bëjnë me zhvillimin e rajonit dhe procesin e integrimit evropian.
Kjo është hera e parë që një takim i procesit të Berlinit organizohet jashtë kufijve të BE-së.
Përveç zyrtarëve të bllokut evropianë dhe të Ballkanit Perëndimor, në samit marrin pjesë edhe kancelari gjerman, Olaf Scholz dhe presidenti i Francës, Emmanuel Macron.
Pritja e liderëve të BE nis në orën 11:00 dhe më pas hapja zyrtare e samitit do të bëhet me fjalën që do të mbajnë kryeministri i Shqipërisë, Edi Rama, presidentja e Komisionit Evropian, Ursula von der Leyen dhe presidenti i Këshillit Evropian, Charles Michel.
Një nga takimet kyçe të pritura gjatë këtij samiti është ajo e Kurtit me kancelarin Scholz.
Gjithashtu, në këtë samit pritet të prezantohet një pako e re e investimeve nga Bashkimi Evropian, e cila është e rëndësishme për zhvillimin ekonomik të rajonit.
Një temë tjetër që pritet të diskutohet është situata e fundit në veri të Kosovës, duke përfshirë sulmin që ndodhi më 24 shtator.