Deputeti i Aleancës për Ardhmërinë e Kosovës (AAK), Bekë Berisha njëherësh kryetar i Komisionit për Çështje të Sigurisë dhe Mbrojtjes, ka thënë se situata në veri është “shumë e tensionuar”, ndërsa qeveria është duke u sjellë sikurse nuk ka ndodhur asgjë.
“Situata në veri është shumë e tensionuar, këta i kanë fituar zgjedhjet, Bislimi po shkon në negociata, bëja këto pyetje atij, kemi dhënë zgjidhje e rrugëdalje, por si duket nuk i kanë marrë parasysh mendimet tona”, ka thënë Berisha në një konferencë për media i pyetur nga gazetarët se si është situata aktuale në veri.
Ai ka shprehur shqetësimet e tij edhe për mungesën e drejtorit të Policisë në Kosovë.
“Është problem të funksionojnë me ushtrues detyre, janë në fazën e kapjes së shtetit”, ka vijuar ai.
Ndryshe, të enjten, Komisioni për Çështje të Sigurisë dhe Mbrojtjes është mbledhur për ta shqyrtuar në parim projektligjin për pensionet e zyrtarëve policorë të Policisë së Kosovës dhe punonjësit e Inspektoratit Policor të Kosovës me autorizime policore.