Të martën në një sallë të improvizuar në fshatin Çabër të Zubin Potokut është mbajtur mbledhja konstituive për zëvendësimin e asamblistëve.
Në këtë seancë janë betuar 16 asamblistë, të cilët do të jenë në zëvendësim të asamblistëve nga Lista Serbe që kanë dhënë dorëheqje më 5 nëntor.
13 prej tyre janë shqiptarë dhe tre janë serbë.
Ndërsa numri i përgjithshëm është 19 asamblistë, ku tre nga ta nuk kishin dhënë dorëheqje më parë.
Seanca është udhehequr nga zv.kryesuesi i kuvendit, Vedat Mehmeti dhe arsyeja për mbajtjen e kësaj seance në Çabër është për shkak të barrikadave të vendosura në veri nga serbët lokalë që nga 10 dhjetori.
Për të parë nga afër këtë betim, ishte edhe Ministri i Administrimit të Pushtetit Lokal, Elbert Krasniqi.
Në mbledhjen e mbajtur për betimin e asamblistëve të rinj të komunës së Zubin Potokut, nuk kanë marrë pjesë tre asamblistët serbë.
Ministri Krasniqi ka treguar se për shkaqe të sigurisë të tre asamblistët seancën e kanë përcjellur online.
Ndryshe, më 14 dhjetor në Mitrovicë të Veriut janë betuar asamblistët e rinj, të cilët sipas vendimit të Komisionit Qendror të Zgjedhjeve, do të zëvendësojnë asamblistët e Listës Serbe që kanë dhënë dorëheqje më 5 nëntor.