Ish-presidenti i ShBA-së Bill Clinton dhe bashkëshortja e tij Hillary Clinton, ish-Sekretarja e Shtetit, kanë rënë dakord të dëshmojnë në hetimin e Kongresit për autorin e ndjerë të krimeve seksuale, Jeffrey Epstein.
Kjo vjen disa ditë para një votimi nëse çifti do të akuzohet për përbuzje penale për refuzimin për t’u paraqitur para Komitetit Mbikëqyrës të Dhomës së Përfaqësuesve pas një bllokimi disamujor, shkruan BBC.
Bill Clinton njihej me Epstein, i cili vdiq në burg në vitin 2019, por ka mohuar të ketë qenë në dijeni të krimeve të tij seksuale dhe thotë se i ka ndërprerë kontaktet dy dekada më parë.
Nuk është e qartë se kur do të zhvillohen dëshmitë, por do të jetë hera e parë që një ish-president i ShBA-së dëshmon para një paneli të Kongresit që kur Gerald Ford e bëri këtë në vitin 1983.
Komiteti Mbikëqyrës i Dhomës së Përfaqësuesve, i udhëhequr nga republikanët, miratoi masën për të dënuar familjen Clinton për përbuzje të gjykatës në fund të muajit të kaluar, me mbështetjen e disa demokratëve.
Të hënën në mbrëmje, zëvendësshefi i stafit të Bill Clintonit, Angel Ureña, konfirmoi përmes një postimi në rrjetin X se çifti Clinton do të paraqitet para komisionit.
“Ata negociuan në mirëbesim. Ju jo”, shkroi Ureña në një mesazh drejtuar Komisionit Mbikëqyrës. “Ata ju treguan nën betim gjithçka që dinë, por ju nuk ju intereson. Megjithatë, ish-Presidenti dhe ish-Sekretarja e Shtetit do të jenë aty. Ata mezi presin të vendosin një precedent që vlen për të gjithë.”
Të dy Clintonët thonë se më herët i kanë dorëzuar komisionit deklarata nën betim dhe kanë dhënë tashmë “informacionin e kufizuar” që kishin lidhur me Jeffrey Epstein.
Çifti i ka quajtur thirrjet ligjore ndaj tyre si “asgjë më shumë se një manovër për të turpëruar rivalët politikë, siç është drejtuar nga presidenti Trump”.
Bill Clinton nuk është akuzuar kurrë për keqbërje nga viktimat e Epstein dhe ka mohuar se kishte dijeni për krimet seksuale të tij.
Regjistrat e avionit privat të Epstein tregojnë se Clinton ka udhëtuar në katër fluturime ndërkombëtare në vitet 2002 dhe 2003. Ish-presidenti shfaqet gjithashtu në fotografi nga prona e financierit të ndjerë, të publikuara nga Departamenti i Drejtësisë për të përmbushur një ligj të miratuar nga Kongresi që kërkon publikimin e të gjithë materialeve hetimore lidhur me pedofilin e dënuar.
Njëra fotografi e tregon Clintonin duke notuar në pishinë, ndërsa një tjetër shfaqet i shtrirë në shpinë me duart pas kokës, në atë që duket të jetë një vaskë e nxehtë.
Ureña deklaroi në dhjetor, kur fotot u publikuan, se ato ishin të vjetra prej dekadash dhe se Clinton kishte ndërprerë çdo lidhje me Epstein përpara se krimet e tij të bëheshin publike.
Muajin e kaluar, Clintonët i dërguan një letër kryetarit të Komisionit Mbikëqyrës, James Comer, duke kritikuar mënyrën se si ai po e menaxhon hetimin për Epstein, raporton BBC.
“Vendimet që keni marrë dhe prioritetet që keni vendosur si kryetar i komisionit për hetimin Epstein kanë penguar zbulimin e fakteve mbi rolin e qeverisë”, thuhet në letër. Ata shtuan se “nuk ka asnjë shpjegim të besueshëm për veprimet tuaja, përveç politikës partiake”.
Comer ka theksuar më herët se thirrjet ndaj Clintonëve janë miratuar me votë bipartizane dhe se “askush nuk është mbi ligjin”.
“Ne kemi komunikuar me ekipin ligjor të Presidentit Clinton për muaj të tërë, duke u dhënë mundësi pas mundësie që të paraqitet për një ditë dëshmi, por ata vazhdojnë të vonojnë”, deklaroi republikani nga Kentucky.