Kosova ka arritur të sigurojë mbi 2 milionë euro nga programi i Bashkimit Evropian për Kornizën Investuese për Ballkanin Perëndimor (WBIF), pas miratimit të katër projekteve strategjike në fushat e energjisë dhe digjitalizimit.
Lajmin e ka bërë të ditur zëvendëskryeministri Besnik Bislimi përmes një postimi në rrjetin social, “Facebook”.
“Përkundër faktit që vendi ynë ishte nën masa të padrejta të BE-së, vitin e kaluar aplikuam në thirrjet e Kornizës Investuese për Ballkanin Perëndimor (WBIF) me katër projekte në fushat e energjisë dhe digjitalizimit. Këto aplikime morën opinion pozitiv fillimisht nga komisioni i vlerësimit, ndërsa tash u zyrtarizua dhe aprovimi final i tyre. Shuma e granteve të asistencës teknike në këto projekte arrin totalin prej mbi 2 milionë euro: për projektet e energjisë vlera është mbi 800 mijë euro, ndërsa në ato të digjitalizimit mbi 1 milion e 200 mijë euro.”, ka shkruar Bislimi.
Ai ka shtuar se pretendimet për humbje të fondeve të BE-së si pasojë e masave ndaj Kosovës janë rrëzuar, duke u demantuar nga vetë rezultatet.