Zëvendëskryeministri i Kosovës, Bisnik Bislimi të premten e 23 shtatorit është takuar me Shefin e Misionit të Luksemburgut në Kosovë, Eric Dietz.
Këtë e ka bërë të ditur Bislimi përmes një postimi në Facebook i cili ka thënë se bashkëpunimi mes Kosovës dhe Luksemburgut është duke u zhvilluar frytshëm në fusha të ndryshme, duke filluar nga arsimi, shëndetësia, inovacioni, IT.
“Gjatë takimit u përmendën dhe arritjet e Kosovës si rritja ekonomike dyshifrore, avancimi me 17 pozicione në Transparency International si disa prej treguesve që demokracia cilësore shkon bashkë me zhvillimin ekonomik”, ka shkruar Bislimi.
Ndër të tjera Dietz është shprehur i kënaqur që ndodhet në Kosovë në një vend me miqësi jetëgjatë me Luksemburgun.
Shefi e Misionit të Luksemburgut ka thënë se është i impresionuar me potencialin e Kosovës, aftësitë, moshën mesatare të re të popullsisë, mundësitë e shumta të investimit dhe bashkëpunimit nën një vizion të përbashkët si dhe riafirmoi mbështetjen e Luksemburgut për perspektivën evropiane të Kosovës.