Zëvendëskryeministri i Kosovës, Besnik Bislimi, në vizitën e tij në Athinë, ka mbajtur një fjalim përpara studentëve në Kolegjin e Nju York-ut.
Siç ka njoftuar Zyra e Kryeministrit, prezent ishin dhe ambasadorë e përfaqësues diplomatikë në Greqi, nga rajoni e më gjerë.
Gjatë fjalimit të tij, Bislimi ka folur për situatën ekonomike në vend, hapat e politikat e ndërmarra nga Qeveria, si dhe rrugëtimin e shtetit drejt integrimit evropian.
Ndër të tjera, ai ka theksuar shkallën e rritjes së punësimit në tre vitet e fundit, duke i përmendur iniciativat e Qeverisë si “platforma Superpuna, formalizimi i ekonomisë dhe indikatorët makro ekonomikë pozitivë”.
“Më tej, ai theksoi se është e rëndësishme të sigurohemi që kjo rritje ekonomike të jetë e qëndrueshme dhe gjithëpërfshirëse. Përmendi arritjen e liberalizimit të vizave dhe aplikimin për anëtarësim në Bashkimin Evropian në dhjetor 2022, pak pas marrjes së Raportit për Vendin, që në atë vit rezultoi të ishte më i miri ndonjëherë për Kosovën dhe me progres të shënuar në zbatimin e reformave”, thuhet në njoftimin e ZKM-së.
Pas fjalës së tij, ai ka diskutuar me pjesëmarrësit për pyetjet e adresuara nga studentët dhe përfaqësuesit diplomatikë mbi çështjet si investimet e huaja në vend, sektorët prioritarë për investim, por edhe rruga drejt Bashkimit Evropian dhe procesi i dialogut.
Gjithashtu, zëvendëskryeministri Bislimi ka falënderuar të gjithë të pranishmit për pyetjet dhe kuriozitetin e tyre dhe interesimin e treguar për të ditur më shumë për situatën në Kosovë, sfidat me të cilat ballafaqohet Kosova dhe objektivat për të ardhmen.