Zëvendëskryeministri i Kosovës, Besnik Bislimi, bashkë me ekipin e tij, të hënën e 14 nëntorit ka udhëtuar drejt Brukselit, ku do të zhvillojë bisedime në kuadër të dialogut Kosovë-Serbi.
Kështu ka bërë të ditur këshilltari i Bislimit, Klisman Kadiu, ku kryenegociatori nga pala kosovare do të takohet me emisarin e BE-së për dialogun, Miroslav Lajçakun.
“Zëvendëskryeministri Bislimi ka udhëtuar për në Bruksel, ku do të marrë pjesë në takime në kuadër të procesit të dialogut me Serbinë”, ka thënë Kadiu për Portali Dukagjini.
Përfaqësuesi i Lartë/Zëvendëspresidenti Josep Borrell, në një konferencë ka thënë se duhet të gjendet një zgjidhje për krizën që po ndodh në mes të Kosovës dhe Serbisë.
Gjithashtu Borrell potencoi se duhet të gjejmë zgjidhje për javën e ardhshme kur fillon të implementohet faza e dytë e vendimit për targa e që është gjobitja e shoferëve me targa ilegale KM.
Borrell e theksoi duhet që negociatorët të gjendën një zgjidhje praktike për targat para datës 21 nëntor, pasi nëse nuk do të arrihet asgjë do të jetë një situatë shumë e rrezikshme.
“Do të nisim takime me kryenegociatorët. Pala kosovare po vjen sonte, jam i gatshëm të bisedojë me liderët, nëse negociatorët arrijnë te një zgjidhje praktike te çështja e targave dhe atë para 21 nëntorit, që është afati i fundit. Nuk mund të arrijmë këtë datë, pasi do të jemi në situatë të rrezikshme. E dini se tërheqja e serbëve në veri nga Policia, gjyqësori, ka krijuar një vakum. Në këtë vakum më e keqja mund të ndodh”, ka shtuar Borrell.
Borrell gjithashtu tha se duhet të ulen tensionet pasi janë duke u arritur nivele të rrezikshme.
“Duhet të ulen tensionet që po arrijnë në nivele të rrezikshme. Mund të themi se jemi duke u përballur me krizën më serioze e të rrezikshme që nga viti 2013, pra në dhjetë vjetët e fundit”, a thënë Borell.
Ai ka shtuar se pala kosovare dhe ajo serbe duhet të tregojnë gatishmëri urgjente për të ulur tensionet.
“Të dyja palët duhet të tregojnë urgjentisht gatishmëri për të ecur para e t’i ulin tensionet. Nuk është e pranueshme nga asnjëra palë që të injorojë apo shkelë marrëveshjet e arritura në dialog”, tha Borrell.
Ai bëri të ditur se mesazhi nga Këshilli evropian që i qartë, të dy palët duhet të tregojnë fleksibilitet.