Zëvendëskryeministri Besnik Bislimi ka vizituar sot Qendrën e studentëve me nevoja të veçanta në Universitetin e Prishtinës “Hasan Prishtina”.
“Qeveria e Republikës së Kosovës mbetet e përkushtuar për krijimin e një ambienti të përshtatshëm dhe mbështetës, në mënyrë që kjo Qendër të jetë një burim i vazhdueshëm për përmirësimin e shërbimeve arsimore dhe përgatitjen e tyre për një të ardhme të suksesshme”, ka shkruar Bislimi.
Bislimi ka treguar se gjatë vitit të kaluar Qeveria ka ndërmarrë iniciativa të ndryshme dhe ka shprehur përkushtimin e saj ndaj studentëve me nevoja të veçanta.
“Masa 1.6 për mbështetjen e personave me nevoja të veçanta e Pakos së Ringjalljes Ekonomike, ka synuar që edhe punësimi të jetë sfidë e cila adresohet për krijimin e një ambienti ku askush nuk ndihet i përjashtuar dhe të gjithë kanë mundësi të barabarta edhe në punësim. Në institucionet para-universitare u rrit numri i të punësuarve të asistentëve për fëmijë me nevoja të veçanta e cila u vlerësua si pozitive dhe nga Raporti për Vendin, por kemi ende shumë për të bërë për të adresuar problematikat e sfidat e ndryshme sa i përket gjithëpërfshirjes në institucionet edukativo-arsimore”, ka thënë ai.
Sipas zëvendëskryeministrit, gjithëpërfshirja dhe mbështetja e studentëve me nevoja të veçanta nuk është thjesht një detyrë programore, por një mision substancial e vleror.