Biznesmeni Nerxhan Musliu në një lidhje direkte në emisionin “FIVE” në RTV Dukagjini, ka thënë se media ishte mjeti përmes të cilit u informua se biznesi i tij ishte suspenduar nga Agjencia e Regjistrimit të Bizneseve në Kosovë (ARBK).
“Në media u njoftova se biznesi im është suspenduar nga ARBK”, ka thënë Musliu.
Ai ka thënë se për të është shqetësuese fakti që, siç thotë ai, e ka hapur biznesin në Kosovë për t’i paguar këtu tatimet dhe jo në Serbi.
Musliu ka shtuar se do të donte të dinte nga vetë ministrja Hajdari se cila do të jetë vazhdimësia e këtij procesi.
I ftuar në studio të diskutonte rreth kësaj çështjeje ishte avokati Florim Shefqeti, i cili ka thënë se sipas ligjit në Republikën e Kosovës, mund të regjistrohen shoqëritë tregtare vendore dhe të huaja.
“Ajo që për ne është çështje diskutabile ka gë bëjë me afatin e nxjerrjeve të vendimeve nga ana e Ministrisë për anulimin e një akti ligjor, sepse ata lëshojnë një akt administrative që aprovohet…Prandaj në këtë situatë vlerësojmë që gabimi është te Ministria sepse nuk duhet të regjistrohet vendlindja, por selia e subjektit juridik qoftë biznes individual ose shoqëri aksionare duhet të regjistrohet duhet të regjistrohet adresa e këtij subjekti.
Tutje, avokati Shefqeti ka thënë se Agjencia Agjencia e Regjistrimit të Bizneseve në Kosovë (ARBK) ka regjistruar “bllanko bizneset”.
“ARBK ka regjistruar bllanko bizneset”, ka shtuar ai.
Komisioni për riverifikimin e dosjeve në Agjencinë e Regjistrimit të Bizneseve të Kosovës (ARBK), të hënën e 31 korrikut ka identifikuar 48 biznese që, sipas tij, janë të regjistruara në kundërshtim me ligjin dhe Kushtetutën e Kosovës.
Këtë informacion e dha të dielën në mbrëmje ministrja e Industrisë, Ndërmarrësisë dhe Tregtisë, Rozeta Hajdari.