Byroja Kosovare e Sigurimit (BKS) ka reaguar ndaj deklaratës së ministrit Hekuran Murati, i cili ka thënë se BKS është duke i detyruar mërgimtarët të paguajnë polica kufitare, për të cilat, ka paguar qeveria.
Në reagimin e BKS-së thuhet se “marrëveshja e nënshkruar nga MFPT-ja, MPB-ja, BQK-ja dhe BKS-ja parasheh subvencionimin e policave njëmujore”.
Sipas kësaj byroje, policat me afat tjetër, si ato 15 ditë, 2 muaj, 6 muaj dhe njëvjeçare janë me pagesë.
Tutje thuhet se deri më tani BKS-ja nuk është në dijeni të ndonjë procedimi penal ndaj punëtorëve të saj lidhur me “rastet e aluduara”, pasi Murati deklaroi se “ka pasur procedim penal për punonjësit e BKS-së lidhur me disa raste të raportuara”.
Më tej, në reagimin e BKS-së është bërë thirrje për ata që kanë paguar për policë njëmujore, që ta kontaktojnë byronë për rimbursim, si dhe për ta raportuar rastin.
“Nëse ka raste të keqpërdorimeve nga punonjësit e BKS-së, këto do të trajtohen me prioritet të lartë dhe përgjegjësit do të përballen me pasojat ligjore”, është thënë tutje në komunikatë.
Ministri Hekuran Murati u ka bërë thirrje mërgimtarëve që vijnë në Kosovë, të mos paguajnë policat kufitare njëmujore për vetura deri në nëntë pasagjerë, pasi ato janë të paguara nga Qeveria.
Ai ka pretenduar se punëtorë të papërgjegjshëm, siç i ka quajtur ai, të Byrosë Kosovare të Sigurimeve (BKS) nuk janë duke informuar saktë që polica kufitare është e subvencionuar dhe sipas tij, po i detyrojnë mërgimtarët që të paguajnë për së dyti.