Shefi i diplomacisë së Bashkimit Evropian, Josep Borrell, ka udhëtuar drejt New Yorkut, ku të martën e 20 shtatorit do të takohet me liderët e Ballkanit Perëndimor.
Vizita e Borrell në SHBA, ndodh në vigjilje të sesionit të 77-të, të Asamblesë së Përgjithshme të Kombeve të Bashkuara.
“Përfaqësuesi i Lartë/Zëvendëspresidenti Borrell më pas do të mbledhë liderët nga Ballkani Perëndimor për takimin tradicional të organizuar në margjinat e OKB-së’, thuhet në njoftim.
Të martën, më 20 shtator, Përfaqësuesi i Lartë/Zëvendëspresidenti Borrell do të bashkohet me Presidentin e Këshillit Evropian Charles Michel dhe Presidenten e Komisionit Evropian Ursula von der Leyen për seancën hapëse të Debatit të Përgjithshëm të Asamblesë së Përgjithshme të 77-të të OKB-së.
Të njëjtën ditë ata do të takohen me Sekretarin e Përgjithshëm të OKB-së, Antonio Guterres.
Në fund të këtij takimi, pritet të ketë një konferencë për shtyp rreth orës 22: 00 thuhet në njoftimin e faqes së Bashkimit Europian.
Ndërkaq, të mërkurën e 21 shtatorit, Borrell do të përfaqësojë BE-në në takimin e 12-të ministror ytë Forumit Global kundër Terrorizmit.
Ndryshe, e ardhmja e Ballkanit Perëndimor është brenda Bashkimit Evropian (BE), ka thënë shefi i diplomacisë evropiane Josep Borrell, duke shtuar se kjo pjesë e rajonit mbetet prioriteti strategjik i BE-së.
I pari i diplomacisë së BE-së, këto komente i ka bërë para darkës jo formale me gjashtë liderët e vendeve të Ballkanit Perëndimor, të cilët i ka ftuar për të diskutuar mbi të ardhmen e rajonit dhe sfidat kryesore me të cilat përballet.
Kryediplomati evropian tha se çështja e sigurisë në Evropë pas pushtimit rus të Ukrainës do të jetë në krye të agjendës së darkës në Bruksel me liderët e Ballkanit Perëndimor.