Bashkimi i Sindikatave të Pavarura të Kosovës (BSPK), ka njoftuar se greva e përgjithshme po vazhdon të zhvillohet pa probleme, sipas rregullave dhe normave ligjore.
Përmes një komunikate për media, thuhet se greva është shtrirë në të gjitha nivelet e shkollave dhe në administratat komunale.
“Greva e përgjithshme është duke u zhvilluar, dhe është shtrirë në të gjitha nivelet e shkollave dhe në administratat komunale në gjithë vendin, pa probleme e plotësisht sipas rregullave dhe normave ligjore”, thuhet në njoftim.
Ndërhyrja e Qeverisë në rrjedhën e grevës, për BSPK-në po konsiderohet joligjore.
Andaj sipas BSPK-së, tërheqja nga greva nuk do të ndodhë.
“Ligji për grevën detyron të punësuarin të bëhet grevist e të hidhet në grevë. Të punësuarit grevistë janë edhe më të vendosur në të drejtën e tyre e sidomos pas kërcënimeve aspak të mira dhe rrënuese për demokracinë”, vijon njoftimi.
Megjithatë, BSPK-ja është në pritje të hapjes së dialogut të mirëfilltë social midis Partnerëve Socialë.
“Është ligji ai që të punësuarit grevistë ia jep këtë të drejtë, e cila nuk duhet t’i cenohet e as që mund t’i cenohet dhe as t’i merret nga askush e aq më pak nga Partneri ynë Social – Qeveria e cila e ka për detyrë t’i mbrojë dhe t’u dalë krah veprimeve ligjore duke e krijuar mjedisin e duhur dhe të shëndetshëm për funksionimin normal e ligjor të shoqërisë”.
Në njoftimin e BSPK-së, thuhet se është ligji ai i cili të punësuarin e detyron të përdorë dhe të organizojë grevën si mjetin e fundit të presionit sindikal sa herë që dështojnë të gjitha përpjekjet për zgjidhjen e konfliktit me mjete të tjera ligjore.
“Të punësuarit grevistë i shtjerrën të gjitha mjetet e presionit sindikal dhe gjatë këtij rrugëtimi edhe u shpërfillën dhe nuk u morën e nuk u pranuan seriozisht kërkesat e tyre të arsyeshme e ligjore”.
“Qeveria dhe Bashkimi i Sindikatave të Pavarura të Kosovës, ulen në tavolinën e dialogimit social dhe e gjejnë zgjidhjen e duhur dhe rrugën e duhur për plotësimin e kërkesave të të punësuarve grevistë”.
Kryeministri Kurti ka reaguar për grevat që janë duke u mbajtur në sektorin e arsimit.
Ai ka thënë “shkolla nuk bën të bojkotohet, duhet ta ketë mësuesin dhe nxënësin, për të cilin e drejtë elementare është mësimi”.
I pari i qeverisë ka shtuar se nuk mund të kompensohet një ditë e mësimit, e cila humbet prandaj, në asnjë mënyrë nuk duhet bojkotohet mësimi.