Bashkimi i Sindikatave të Pavarura të Kosovës, po mban një protestë duke kërkuar që t’iu plotësohen gjashtë kërkesat e tyre.
Kjo protestë fillon me marshim nga Biblioteka Kombëtare dhe do të vazhdojë deri te sheshi “Skënderbeu”, para ndërtesës së Qeverisë.
BSPK ka njoftuar se, ekzekutivit të Qeverisë do t’i parashtrojnë këto kërkesa:
- Rritja e pagave për 100 euro për të gjithë të punësuarit që marrin paga nga buxheti i Kosovës deri sa të përmbushen kërkesat e mëposhtme.
- Miratimi i Ligjit të Pagave.
- Rritja e rrogës minimale
- Fillimi i zbatimit të Ligjit për Sigurimin Shëndetësor
- Plotësim-ndryshimi i Ligjit për Skemat Pensionale
- Të ndryshohet neni në Ligjin e Sigurisë Pensionale të vitit 1983, sipas të cilit, kërkohet që të ketë 15 vjet kontribut në skemat pensionale para datës 01.01.1999.
Para organizimit të kësaj proteste, janë bërë thirrje të shumta nga kryetari i BSPK-së, Atdhe Hykolli.
“E thërrasim Partnerin Tonë Social, Qeverinë që të merret më këmbëngulshëm e më profesionalisht me hartimin e Projektligjit për Paga, duke i përfshirë edhe kapacitetet tona profesionale, dhe të hapë rrugë për Pagën Minimale dhe për Kontratën Kolektive, për këto akte të rëndësishme e tejet të nevojshme juridike të cilat po tejzvarriten”, ka shkruar ai.
Sipas tij , Qeveria duhet ta zbatojë kontratën kolektive, të garantojë siguri dhe shëndet në punë, ta konsiderojë përvojën e punës për vitet ’90 -’99, ta aplikojë sigurimin shëndetësor, ta aprovojë pagën minimale dhe të sigurojë punë dhe jetë të dinjitetshme.