Bashkimi i Sindikatave të Pavarura të Kosovës (BSPK), ka bërë të ditur se takimi me presidenten e Kosovës, Vjosa Osmani, ka qenë vetëm për të shikuar mundësinë e hapjes së dialogut social me partnerët socialë dhe jo për ndonjë arsye tjetër.
“Sot, më 6 shtator 2022, e martë, duam të njoftojmë opinionin e gjerë se takimet konsultative të Kryetarit të BSPK-së me të gjithë ata që e duan zgjidhjen nëpërmjet dialogut social, si edhe takimi konsultativ me Presidenten është vetëm gjetja e rrugës së duhur për hapjen e dialogut të duhur social ndërmjet partnerëve socialë dhe jo diçka tjetër siç jepet, a siç do të dëshironin të ishte nga ata që përhapin informacione jo të sakta”, thuhet në komunikatën e BPSK-së.
E vetmja mënyrë për të dalë nga greva, sipas BSPK-së, është përmes dialogut social me Qeverinë e Kosovës.
“Prandaj duam edhe njëherë t’ia përcjellim opinionit të gjerë se e vetmja zgjidhje e duhur dhe e qëndrueshme për dalje nga Greva e Përgjithshme është dialogu social ndërmjet Partnerëve Socialë, Qeverisë dhe Bashkimit të Sindikatave të Pavarura të Kosovës dhe jo format e tjera të komunikimit”, thuhet në komunikatën e tyre.
Greva e organizuar nga BSPK-ja ka filluar nga data 25 gusht e këtij viti.