Profesori universitar, Seb Bytyqi, ka thënë se kryeministri i Kosovës, Albin Kurti nuk e ka fare të vështirë të përballet me kritikat apo akuzat e opozitës karshi dialogut me Serbinë.
Ai në emisionin “Five”, u shpreh se nënshkrimet për Asociacionin e Komunave me Shumicë Serbe, i kanë dhënë dy partitë opozitare LDK dhe PDK.
“Nuk po e shoh që ka problem kryeministri që të ballafaqohet me kritikat e opozitës, madje shpeshherë është shumë e lehtë, sepse nënshkrimet për Asociacionin janë dhënë nga dy partitë opozitare LDK dhe PDK”, ka thënë ai.
Por, sipas tij në çështjet e rëndësishme për shtetin e Kosovës duhet të ketë konsensus mes pozitës dhe opozitës.
“Ekziston një nevojë për një konsensus, apo unitet sa i përket disa temave kyqe. Sigurisht ka hapësirë për debat, sepse jetojmë në një demokraci parlamentare dhe duhet të ketë debat. Është diçka e mirë që pati debat dhe në të njëjtën kohë duhet si shtet të kemi një konsensus për disa tema kryesore”, ka thënë ai.
“Është i mundshëm konsensusi, sepse ka konsensus për disa pika. Kurse për vetë marrëveshjen AAK e përkrah, ekziston disa pika ku ka konsensus. Sa i përket debatit dëgjuesit vetë mund ta gjykojnë, dhe shpresoj që e kanë lexuar marrëveshjen, aty kryesisht bëhet fjalë për rizotime për marrëveshje të mëhershme të nënshkruar nga opozita”, ka vijuar ai.
Takimi i radhës në kuadër të dialogut pritet të mbahet me 18 mars në Ohër.