Gjykata Penale e Tiranës ka caktuar burgim pa afat për 5 të arrestuarit e operacionit antidrogë, ku u kapën 11 mijë e 300 doza ekstazi, me peshë 5 kg e 93 gr dhe me vlerë tregu 400 mijë euro.
Siç raporton EURONEWS, Mithat Ramadani, Besnik Mujeci, Kalem Picari, Ambra Myftari dhe Daniel Avdija do të hetohen në qeli.
Përveç sasisë së lëndës narkotike, edhe një automjet e pesë aparate celularë u sekuestruan.
Dozat e drogës sintetike janë me ngjyrë kafe dhe kanë logon e markës së luksit, Louis Vuitton.
Ndryshe, Mujeci dyshohet se bashkë me katër persona të tjerë kanë tentuar të transportojnë 11 mijë e 300 tableta ekstazi MDMA, vlera e së cilës arrin 400 mijë euro.
Mujeci, siç raporton Policia e Shqipërisë, kishte transportuar lëndë narkotike duke i përdorur autobusët në sezonin turistik nga Kosova në Shqipëri.
“Pasi dërgesat arrinin në Tiranë, transportoheshin me autovetura të marra me qira në Tiranë dhe në qytete të tjera, kryesisht bregdetare, dhe vendet e shkëmbimit caktoheshin në vende publike me shumë lëvizje dhe fluks njerëzish. Për arritjen e marrëveshjeve me shpërndarësit e drogave sintetike në Shqipëri, trafikantët kërkonin pagesa paradhënie, ose edhe lënien e automjeteve si garanci”, thuhet në njoftimin e policisë.
Ndryshe, nga Lëvizja Vetëvendosje kanë bërë të ditur më herët të martën se kanë nisur procedurat disiplinore ndaj asamblistit Mujeci.
Gjatë ditës, nga LVV-ja kanë bërë të ditur se Mujeci është shkarkuar nga të gjitha strukturat e partisë.