Ish-diplomati Blerim Canaj ka kritikuar qeverinë të udhëhequr nga Albin Kurti për përdorimin e situatës në veriun e vendit për përfitime elektorale.
Në “FIVE” të Dukagjinit, Canaj kritikoi veprimet e qeverisë në veri dhe vuri në dukje se këto veprime po bëhen për t’i mbuluar dështimet në fusha të tjera. Sipas Canajt, ura e Ibrit është bërë një simbol politik që qeveria po e përdor për të ngjallur ndjenja nacionaliste në një vit zgjedhor.
“Ura është një farë simboli politik, të cilën që kam frikë që Qeveria dëshiron ta shfrytëzojë për shkak të dështimeve në çdo dikaster që e ka udhëhequr dhe në çdo fushë, tash me veriun pretendon të prek një farë sentimenti nacional meqenëse jemi në një vit zgjedhor, atëherë do t’i duhet kjo në zgjedhjet e ardhshme, sidomos Kurtit”, ka thënp Canaj.
E, ndërkombëtarët i nisën kritika drejtuar Qeverisë për veprimet përfshijnë hapjen e urës së Ibrit dhe mbylljen e nëntë objekteve të Postës së Serbisë në veri, zona të banuara kryesisht nga serbët.
Canaj paralajmëroi se prishja e marrëdhënieve me ndërkombëtarët nuk është në interesin kombëtar të Kosovës dhe se veprimet e njëanshme të qeverisë mund të kenë pasoja negative për vendin.
“A është interes kombëtar i Kosovës prishja me ndërkombëtarët? Ku na çon kjo neve, në qoftë se ne e marrim kokë më vete, ku na çon kjo?” pyeti Canaj, duke theksuar rëndësinë e bashkëpunimit dhe koordinimit me partnerët ndërkombëtarë.