Nënkryetarja e Kuvendit nga radhët e PDK-së, Vlora Çitaku, i është përgjigjur deklaratave të Albulena Haxhiut lidhur me Listën Serbe.
Çitaku ka theksuar se kjo listë nuk ka mundësi ta shantazhojë PDK-në, pasi, sipas saj, partia që ajo përfaqëson nuk ka pasur kurrë marrëveshje të fshehta me të.
“Lista Serbe nuk ka si të na shantazhojë, sepse ne nuk kemi bërë kurrë marrëveshje të fshehta e të ndyra me ta, as kundër veteranëve, as pazare të dështuara për gjyqtarë të Gjykatës Kushtetuese”, ka shkruar ajo.
Ajo ka theksuar se qëndrimi i PDK-së është i bazuar në parime dhe në mbrojtje të rendit kushtetues.
“Qëndrimi ynë është parimor, në mbrojtje të rendit kushtetues, të cilin ju e sfidoni pa fund. Ju mund të provoni ta relativizoni të vërtetën, por nuk mund ta fshini”, ka shtuar Çitaku.
Duke iu drejtuar Lëvizjes Vetëvendosje, Çitaku ka akuzuar se kanë lidhur “pakte të turpit” dhe kanë dëmtuar besimin e qytetarëve në institucionet e shtetit.
“Jeni ju që keni lidhur paktet e turpit dhe keni rrënuar besimin e qytetarëve në institucionet e shtetit. Në mungesë të shumicës për të ndërtuar qeverinë, po bëni taktizime fëminore”, ka përfunduar ajo.