Çmimet në Kosovë kanë vijuar të rriten me një shpejtësi alarmante, duke shkaktuar vështirësi të mëdha për familjet vendase. Agjencia e Statistikave të Kosovës ka publikuar një raport që tregon se në muajin qershor, çmimet e produkteve bazë janë rritur me 2.8 për qind, krahasuar me të njëjtën periudhë të vitit të kaluar.
Deputeti i Partisë Demokratike të Kosovës (PDK) dhe anëtar i Komisionit për Ekonomi, Ferat Shala, ka shprehur shqetësimin e tij për këtë situatë ekonomike të rënduar.
Në një intervistë për Front Online, ai ka akuzuar Qeverinë për degradim të ekonomisë së vendit dhe ka theksuar se politikat e tyre të këqija janë shkaktari kryesor i kësaj krize.
“Është e vërtetë që situata po degradon në dëm të ekonomive familjare dhe në dëm të vështirësive për ekonominë e çdo qytetari në Kosovë, si rezultat i dy faktorëve. Por, rezultati kryesor bazik janë politikat e këqija të kësaj qeverie, të cilat në parim e kanë shumëfishuar presionin, e kanë dëmtuar mënyrën e të bërit biznes dhe në njëfarë forme e kanë sjellë ekonominë e vendit në një situatë të cilën e po e shohim tashmë”, ka deklaruar ai.
Ai gjithashtu ka ngritur shqetësimin mbi rënien e prodhimit vendor dhe rritjen e importeve, duke përmendur mallrat serbe si një burim të rëndësishëm të importit.
Ligji për Paga u kritikua ashpër nga deputeti, i cili argumentoi se ky ligj nuk ka përcaktuar një logjikë të shëndoshë për goditjen e sektorëve të sigurisë dhe arsimit të lartë.
“Sektorët më të goditur me Ligjin e Pagave kanë qenë sektorët e sigurisë dhe arsimit të lartë, është habitshme cila është logjika e shëndoshë që të godasësh sektorët më primar të funksionimit të shtetit që është sektori i sigurisë, policisë dhe trupave të tjera të mbrojtjes”, ka thënë Shala.
Për shqetësimet e sindikatave, ai ka njoftuar se ato nuk janë gjetur me mirëkuptim te pushteti dhe se kërkesat e tyre janë të drejta dhe legjitime.