Ministri i Punëve të Brendshme të Shqipërisë, Blendi Çuçi, është duke marrë pjesë në Gjermani, ku është duke u mbajtur takimin e Ministrave të Brendshëm të Procesit të Berlinit.
Çuçi ka treguar e atje është së bashku me homologët nga vendet e Ballkanit Perëndimor dhe vendet e BE-së, ku kanë diskutuar për çështje të sigurisë së brendshme dhe migracionit të paligjshëm.
“Riafirmova qëndrimin e Shqipërisë për intensifikimin e bashkëpunimit rajonal, për lehtësimin e mëtejshëm të lëvizjes në tregun e punës, kapitalit dhe mallrave. Ne kemi qenë pionerë të bashkëpunimit rajonal prej momenteve të para të Procesit të Berlinit dhe kemi avancuar me nënshkrim të marrëveshjeve në nivel bilateral e trilateral”, ka shkruar Çuçi në Facebook.
Sipas tij, është vlerësuar roli Shqipërisë për përballimin e flukseve migratore nga Lindja e Mesme dhe Afrika me destinacion final BE-në.
“Megjithatë duhet të bashkërendojmë punën në vijimësi për të forcuar luftën kundër kontrabandimit të klandestinëve, si dhe të rrisim më tej bashkëpunimin në përballjen me krimin e organizuar dhe për riintegrimin e personave të kthyer nga zonat në konflikt”, ka shkruar ai.
Ai ka përfunduara duke falënderuar Gjermaninë për të këtë iniciativë të rëndësishme.