Departamenti Amerikan i Shtetit njoftoi të premten se ka pezulluar menjëherë lëshimin e vizave për personat që udhëtojnë me pasaporta afgane.
“Departamenti po ndërmerr të gjitha hapat e nevojshëm për të mbrojtur sigurinë kombëtare dhe publike të SHBA-së”, shkruhet në postimin e bërë në platformën X.
Sekretari i Shtetit, Marco Rubio, theksoi se mbrojtja e kombit dhe qytetarëve amerikanë mbetet prioriteti kryesor.
Ky vendim u mor pas identifikimit të Rahmanullah Lakanwal, një shtetasi afgan, si autori i dyshuar i sulmit në afërsi të Shtëpisë së Bardhë të mërkurën, ku u vra një anëtar i Gardës Kombëtare dhe u plagos një tjetër.
Pas incidentit, SHBA-të pezulluan të gjitha procedurat e imigracionit për shtetasit afganë. Shërbimet e Shtetësisë dhe Imigracionit (USCIS) njoftuan se kanë ndalur gjithashtu të gjitha vendimet për azil.
“USCIS ka pezulluar vendimet për azil derisa të sigurohemi se çdo i huaj verifikohet dhe shqyrtohet në nivelin më të lartë të mundshëm. Siguria e popullit amerikan është gjithmonë prioritet”, shkroi drejtori i USCIS-it, Joseph Edlow, në X.