Në Dhomat e Specializuara të Kosovës (DhSK) në Hagë ka filluar dëshminë Gjergj Dedaj, i cili është dëshmitari i 33-të (me kodin Ë03825) në çështjen gjyqësore ndaj Hashim Thaçit, Kadri Veselit, Jakup Krasniqit dhe Rexhep Selimit.
Dedaj është ankuar për pyetjet që ZPS i ka bërë ndaj tij, duke thënë se ka kaluar shumë kohë dhe se disa gjëra nuk i kujtohen.
Po ashtu, ai tha se në të kaluarën ka bërë deklarata të pamatura dhe se tash është pishman për to.
“Po bëni padrejtësi ndaj meje, po më pyesin për gjërat që kanë kaluar 25 vjet… Detajet nuk mund t’i mbajë mend, këto deklarata i kam bërë në presionin shpirtëror, për shkak të rivarrimeve, pjesëtarëve të vdekur… disa deklarata i kam bërë jashtë vetes time, të pamatura, që ndihem keq, kërkoj falje publike, nuk kanë të bëjnë me realitetin”, tha ai.
Dedaj vazhdoi duke thënë se nuk i kujtohen mirë ngjarjet e viteve 98-99.
“Nuk më kujtohet. Madje, për shumë gjëra me më pyet çka kam bërë për këto tri ditë në Hagë, nuk i di”, tha ai.
Ndryshe, këtë seancë, Jakup Krasniqi është duke e ndjekur përmes videolidhjes, ndërsa të akuzuarit e tjerë janë prezent në sallë.