Javën e kaluar, një delegacion nga Policia e Kosovës ka realizuar një vizitë studimore zyrtare në Berlin dhe Brandenburg në Gjermani.
“Synimi i vizitës ishte lidhja dhe shkëmbimi i njohurive dhe përvojave në zhvillimin e grave në pozicione drejtuese në polici, duke u fokusuar në mentorimin e grave në Policinë e Shtetit të Brandenburgut dhe në Policinë e Kosovës si dhe shkëmbimi i përvojave në trajnimin dhe avancimin profesional të punonjësve të policisë duke avancuar trajnimet policore dhe ngritur kapacitetet profesionale të Policisë së Kosovës. Në Brandenburg delegacioni kosovar është pritur nga Presidentja e Shkollës së Policisë në Brandenburg znj.Dr.Heike Wagner dhe stafi i saj”, ka njoftuar Policia e Kosovës.
Nga presidentja Heike Wagner është dhënë zotimi dhe hapi i parë drejt jetësimit të deklarimit të përbashkët të nënshkruar me datë 22 tetor 2019 ndërmjet Policisë së Kosovës dhe Akademisë Policore në Brandenburg.
“Gjatë kësaj periudhe delegacioni nga Policia e Kosovës është takuar edhe me agjentë special dhe Atashe të FBI të stacionuar në Berlin. Me delegacionin në fjalë është shikuar mundësia e trajnimeve speciale në fushat e ndryshme deri tek ato të ndjeshme të sigurisë siç janë trajnimet e veçanta të sigurisë”, thuhet në njoftim.
Është vizituar edhe Akademia e Policisë në Berlin dhe është shikuar mundësia e shkëmbimit të përvojave policore me akademinë në fjalë. Po ashtu, është vizituar stacioni i policisë në Bernau.