Deputetja e Partisë Demokratike të Kosovës (PDK), Blerta Deliu-Kodra në seancën e 17 nëntorit në Kuvendin e Kosovës ka kritikuar Qeverinë e Kosovës për mosadresim të problemeve dhe sipas saj kjo “qeveri nuk ka vizion”.
Ajo ka përmendur edhe raportimin e mediave se Togu i Gardës Ceremoniale ka bërë nderime për të rënët serbë të vitit 1912, ani pse ka pasur një reagim publik nga Ministria e Mbrojtjes së Kosovës duke theksuar se “asnjëherë nuk nderohen të rënët serbë”.
Sipas saj, për këtë rast nuk kanë asnjë faj ushtarët e FSK-së sepse ata vetëm i përgjigjen detyrës së tyre, kështu duke kërkuar dorëheqje nga ministri i Punëve të Brendshme, Xhelal Sveçla.
“Nëse është bërë me vetëdije të plotë, akt i dorëheqjes nga ministri Svecla e kryeministri Kurti do të ishte adresimi i përgjegjësisë institucionale, në një vend normal me përgjegjësi, një kërkim falje publike do të ishte më e pakta që do duhej kërkuar”, ka thënë ajo.
Ajo ka kritikuar edhe Ministrinë e Punëve të Jashtme, përkatësisht ministren e këtij dikasteri, Donika Gërvalla-Schwarz.
“Donika Gërvalla ska të ndalur me gafat e saj, është kaq larg rrjedhës së ngjarjeve sa që bëhet gaz me deklaratat e saj për BE e NATO për shpërthimin raketor në Poloni për të mbuluar deficitin e saj të punës”, ka vijuar ajo.
Ndër të tjera, ajo është adresuar në emër të PDK-së duke theksuar se “Kosova meriton qeverisje tjetër”.
“Aman mos na bëni horë, vetëm sherrin jemi duke jua parë”.
Kritikohet reagimi i gabuar i ministres Gërvalla për raketën në Poloni