Pa kaluar as një javë nga takimi i mbajtur në Bruksel mes kryeministrit të Kosovës, Albin Kurtit dhe presidentit të Serbisë, Aleksandër Vuçiq, nikoqirët e takimit pritet të vijnë në Kosovë.
I dërguari amerikan për Ballkanin Perëndimor, Gabriel Escobar së bashku me të dërguarin e BE-së për dialog, Miroslav Lajçak pritet që të martën të qëndrojnë në një vizitë zyrtare në Prishtinë.
Ndonëse agjenda e tyre nuk është bërë e ditur, mesazhet e tyre duket se do të jenë mjaft të qarta.
Për njohësin e çështjeve politike në vend, Artan Muhaxhirin, Kurti e Vuçiq nuk do të mund të bëjnë ball karshi presionit të ndërkombëtarëve.
“Presioni është i madh dhe nuk besoj se as presidenti serb as kryeministri Kurti do t’i bëjnë ball këtij presioni dhe pritet që nga dy palët të ketë kompromise”, ka thënë Artan Muhaxhiri.
Se qëllimi është mjaft i qartë i dy emisarëve mendon edhe Arbnor Sadiku.
“Ardhja e përfaqësuesve për dialog në Kosovë, këto ditë është synim për ta bindur Kurtin të lëshojë pe në proces të dialogut e po ashtu edhe presidenti serb të bëjë të njëjtën gjë”, ka thënë Arbnor Sadiku – analist.
Në takimin e Brukselit që ndodhi më 18 gusht, palët nuk arritën asnjë pikë progresi.
Ndonëse pala kosovare nuk ka nxjerrë asnjë detaj nga ky takim, ka qenë presidenti i serb që ka pretenduar se Albin Kurti ka parashtruar gjashtë pika për t’u arritur marrëveshje.
Vuçiq, në konferencë për media u shfaq i acaruar me këto kërkesa të Kurtit.
Por, prezentimin e kërkesave të palës kosovare nga ana e serbëve po e kritikon analisti Artan Muhaxhiri.
“Qeverisë Kurti i mungon transparenca për dialogun pasi tash e disa herë ne marrim informacione nga presidenti i Serbisë e jo nga kryeministri jonë. Kjo është mosrespektim ndaj qytetarëve”, u shpreh Muhaxhiri.
“ Ka pasur një mungesë të transparencës në proces të dialogut nga ana e kryeministrit Kurti dhe është zgjedhur nga qytetarët nuk ish dashur të ketë fshehtësi për procesin e dialogut nga ana e tij”, ka thënë analisti Sadiku.
Lidhur më gjashtë pikëshin që thuhet se e ka prezantuar Albin Kurti para Aleksandër Vuçiqit e ndërmjetësuesve ndërkombëtarë, RTV Dukagjini ka adresuar pyetje tek qeveria.
Por, të njëjtit nuk kanë kthyer përgjigje.