Seanca e së premtes në Kuvendin e Kosovës ka dështuar të mbahet pasi Aleanca e Ardhmërisë së Kosovës (AAK) e ka shtyrë rezolutën për një datë tjetër, pasi nuk pati mjaftueshëm numër të deputetëve në sallë.
Shefi i Grupit Parlamentar të AAK-së, Besnik Tahiri, ka thënë se në bashkëpunim me grupet parlamentare ky debat për tri vjet qeverisje është shtyrë për një ditë tjetër.
“Tash e tre muaj ka vendosë në kryesi një kërkesë për debat për tri vjet qeverisje, një. Temë kaq e rëndësishme që duhet të jetë ballafaqim në mes opozitës dhe mes Kurtit e mes nesh mungojnë kaq shumë deputetë. Grupet parlamentare po e shtyjnë këtë debat, në kryesi vendosim për datë”, ka deklaruar Tahiri.
Aleanca për Ardhmërinë e Kosovës sot në seancën e Kuvendit të Kosovës kishte propozuar që në rend dite të jetë një rezolutë, përmes së cilës, do të kërkohet shkarkimi apo dorëheqja e qeverisë që drejtohet nga kryeministri Albin Kurti.
Sipas kësaj rezolute, pas dorëheqjes ose shkarkimit të qeverisë, propozohet edhe shpërndarja e Kuvendit të Kosovës.
“Të gjithë parametrat e deritanishëm, sot në trevjetorin e kësaj qeverie, janë dëshmi se janë plotësuar të gjitha kushtet që qeveria ta përmbyllë mandatin e saj me dorëheqje, ose mocion për shkarkimin e saj, të propozuar nga AAK”- thuhej në rezolutë.