Gojart Bajrami, djali i mjekut Vezir Bajrami, ka dhënë disa detaje mbi atë se si mund të përshkruhet ajo se çfarë kishte parë babai i tij në masakrën e Reçakut, si janë gjetur viktimat e si janë trajtuar ato.
Në një linjë direkte në emisionin “Five”, në RTV Dukagjini, Gojart Bajrami e ka lexuar një pjesë të origjinalit të dorëshkrimit apo ditarit të babait të tij, Vezir Bajramit.
“E kam para vetes një dorëshkrim apo një ditar, në të cilën është shkruar e gjithë ngjarja e 15 dhe 16 janarit. Faktikisht me 16 janar kishte fillu masakra në Reçak, luftimet, pjesa tjetër e stafit mjekësor ishin të njoftuar vetëm nga të plagosurit që vinin në fshatin Petrovë. Të nesërmen me 16 janar ka filluar evidentimi i kësaj masakre, secilës plagë të dokumentuar në dorëshkrim pastaj edhe të botuar në librin “Masakra e Reçakut”, e dokumentuar pastaj edhe me xhirime e foto të mediave të huaja”, tha ai.
Bajrami, i emocionuar nga fragmentet që kishte shkruar babai i tij Veziri, lexoi shkurtimisht mbi torturimin dhe masakrimin e një prej viktimave të kësaj masakre.
“Po bëj përpjekje të lexoj nga dorëshkrimi:
Mëngjes 16 janar, 1999 Qetësi
Zgjohen ushtarët dhe të gjithë dalin në detyrat e tyre, zgjohen edhe stafi mjekësor i përbërë nga motrat Mevlide, Vlorë dhe Nergjivane. U them të bëjnë gati përpunimin e plagëve të të plagosurve, të vendosen infuzionet, injeksionet, detyra këto që iu përcaktuan motrës Vlorë, dhe u nisëm në Reçak… Ajet Minush Brahimi, nga fshati Reçak rreth 37 vjeç, i vrarë me armë zjarri nga afërsia, i maltretuar fizikisht, kokën e ka të prerë nga trupi, lëkurën e ka të hequr nga koka, sytë të nxjerrë jashtë e të humbur, veshët po ashtu të humbur, kafkën të thyer me mjet të topitur dhe të fortë, trurin të nxjerrë dhe të humbur. Fitoj bindjen se truri i tij është marrë nga policia serbe. Lihet përshtypja e një të masakruari tipik nga kanibalët dhe kafshët e egra”, tha më tej ai.
Ky është fragment i shkëputur nga e njëjta ditë.