Ministri i Punëve të Jashtme i Maqedonisë së Veriut, Bujar Osmani, gjatë qëndrimit në Shtetet e Bashkuara të Amerikës (ShBA), u takua edhe me përfaqësues të diasporës shqiptare në New Jork dhe New Jersey.
Shefi i diplomacisë së RMV-së ka vizituar mësonjëtoret ku nxënësit shqiptarë ndjekin mësimet në gjuhën shqipe.
Osmani iu referua në detaje projekteve të realizuara të Ministrisë së Punëve të Jashtme për dy vitet e gjysmë të fundit edhe si rezultat i apelit dhe interesimit të diasporës.
Kryediplomati shqiptar, ndër të tjera, veçoi digjitalizimin e shërbimeve konsullore (e-konsullata), vendosjen e stacioneve bazë dhe mobile, përmes të cilave, për një kohë të shkurtër pajisesh me dokumentin e udhëtimit, financimin e projekteve për diasporën dhe përfitimet ekonomike në rast investimi në Maqedoninë e Veriut.
