Disa anije janë drejtuar drejt Ngushticës së Hormuzit, ndërsa bisedimet e paqes mes Iranit dhe Shteteve të Bashkuara do të nisin këtë të shtunë në Islamabad.
Sipas të dhënave të gjurmimit të anijeve, disa mjete lundruese – shumica prej tyre kineze – kanë kaluar përmes ngushticës ose po lëvizin nga Gjiri Persik drejt saj, sipas faqes MarineTraffic, shkruan Reuters, transmeton Dukagjini.
Një anije kineze për transport mallrash kaloi gjatë natës, pasi ishte nisur nga porti irakian Umm Qasr pothuajse një muaj më parë.
Konflikti mes Iranit, Shteteve të Bashkuara dhe Izraelit ka ndalur praktikisht qarkullimin në këtë rrugë të rëndësishme detare, e cila para luftës përpunonte rreth 20% të transportit global të naftës.
Qindra anije tani janë në pritje në të dyja anët e kësaj pike të ngushtë strategjike.
Dy cisterna kineze të naftës bruto, secila me kapacitet rreth 300 mijë tonë dhe të ngarkuara plotësisht, po i drejtoheshin ngushticës të shtunën. Të dyja po lundronin pranë brigjeve iraniane.
Ndërkohë, një cisternë gazi natyror të lëngshëm me flamur të Botsuanës, e quajtur “Nidi”, duket se po bën një përpjekje të dytë për të dalë nga Gjiri, pasi ishte kthyer mbrapa herët të premten.
Megjithatë, trafiku mbetet vetëm një pjesë e vogël e asaj që do të ishte normalisht – rreth 100 anije në ditë.
Të enjten, presidenti i SHBA-së Donald Trump deklaroi se “Irani po bën një punë shumë të dobët, disa do ta quanin të pandershme, në lejimin e kalimit të naftës përmes Ngushticës së Hormuzit”.
“Kjo nuk është marrëveshja që kemi!” shkroi Trump në rrjetet sociale.
Agjencia gjysmëzyrtare iraniane e lajmeve Tasnim raportoi nga Islamabad të shtunën se Irani “ka ruajtur kushtet aktuale për kalimin e cisternave nëpër Ngushticën e Hormuzit”, si përgjigje ndaj asaj që Teherani e konsideron shkelje të armëpushimit nga SHBA, përfshirë vazhdimin e sulmeve të Izraelit ndaj Hezbollahut në Liban.
Irani ka deklaruar se anijet mund të kalojnë nëpër ngushticë vetëm me miratimin e tij.