Ish-kryenegociatorja e Kosovës në dialogun me Serbinë, Edita Tahiri, ka vlerësuar se marrëveshja e arritur së fundi në Ohër nga kryeministri i Kosovës, Albin Kurti, s’ka asnjë referencë të Kushtetutës së Kosovës.
Përmes një postimi në Facebook, Tahiri teksa ka kujtuar Ditën e Kushtetutës së Kosovës, ka thënë se ekzekutivi kosovar e ka shkelur aktin më të lartë juridik të shtetit.
“Sot Dita e Kushtetutës të shtetit tonë. U shkel nga qeveria, nuk përmendet në marrëveshje me Serbinë, madje as për Asociacionin [e Komunave me shumicë serbe] dhe vetmenaxhimin për pakicën serbe. Marrëveshja duhet të shkojë në Gjykatën Kushtetuese!”, shkroi ajo.
Të dielën, janë bërë 15 vjet nga miratimi i Kushtetutës së Republikës së Kosovës.
Kushtetuta e Kosovës është ratifikuar më 9 prill 2008, ndërsa ka hyrë në fuqi më 15 qershor 2008.
Kushtetuta është akti më i lartë juridik, që garanton të drejtat dhe liritë themelore të të gjithë qytetarëve të vendit.
Në Kushtetutën e Kosovës një pjesë e madhe rrjedh nga Plani i Martti Ahtisaarit, duke u dhënë kështu të drejta specifike grupeve minoritare dhe një ambient më të sigurt për të gjithë qytetarët e Kosovës.
Kushtetuta e definon Kosovën si një shtet me pikëpamje neutrale ndaj fesë – neni 8, ka 14 kapituj dhe 162 nene.