Të paktën dy persona janë vrarë nga sulmet ruse me raketa dhe dronë në Ukrainë, ndërsa në disa rajone janë regjistruar ndërprerje emergjente të energjisë elektrike.
Shërbimi Shtetëror i Emergjencave të Ukrainës (DSNS) njoftoi se një grua 76-vjeçare ka humbur jetën dhe tre persona të tjerë, përfshirë një 16-vjeçar, janë plagosur pasi shtëpia e tyre u godit në afërsi të qytetit Vyshhorod, në rajonin e Kievit.
Në një zonë tjetër të rajonit të Kievit, në distriktin Obukhiv, dy shtëpi janë dëmtuar nga sulmet. Mediat ukrainase kanë publikuar pamje të një ndërtese pesëkatëshe banimi të dëmtuar në lagjen Svyatoshynsky të Kievit.
Sipas operatorit shtetëror të energjisë, Ukrenergo, Rusia ka kryer gjatë natës sulme “masive” me dronë dhe raketa. Alarmet ajrore janë aktivizuar në të gjithë vendin, ndërsa ndërprerje emergjente të energjisë janë vendosur në disa rajone për shkak të dëmeve në rrjet.
Si masë paraprake pas bombardimeve ruse, Forcat e Armatosura të Polonisë njoftuan se avionët luftarakë janë ngritur në ajër dhe sistemet e mbrojtjes ajrore janë vënë në gatishmëri, një procedurë që Varshava e ndjek rregullisht gjatë sulmeve të tilla pranë kufirit të saj.
Një ditë më parë, presidenti ukrainas Volodymyr Zelensky paralajmëroi se është “natyra e rusëve të kryejnë sulme të mëdha gjatë Krishtlindjeve”, duke theksuar se data 23 dhjetor, Nata e Krishtlindjes dhe Dita e Krishtlindjes mund të jenë në rrezik të veçantë.
Sulmet e fundit ndodhin pas përfundimit të një raundi të ri përpjekjesh diplomatike të udhëhequra nga Shtetet e Bashkuara në Miami, edhe pse deri më tani nuk është shënuar ndonjë përparim konkret drejt ndaljes së luftës./BBC