Që nga dita e diel e 10 korrikut, në Qendrën Kryesore të Mjekësisë Familjare (QKMF) në Han të Elezit kanë kërkuar ndihmë mbi 100 banorë të fshatit Gorancë.
Këtë e ka konfirmuar për Portalin Dukagjini, kryetari i kësaj komune, Mehmet Ballazhi.
Ai tha se dyshimet e para janë se është helmim nga uji i pijes, por ende nuk janë kthyer mostrat që janë marrë për analizë nga Instituti Kombëtar i Shëndetësisë Publike të Kosovës (IKShPK), në mënyrë që të kuptohet shkaku kryesor i këtij helmimi.
Ballazhi, ndër të tjera, ka shtuar se prej së dielës duke filluar nga ora 20:00, qytetarët kanë filluar të shkojnë në QKMF me simptoma të vjelljes, barkqitjes dhe temperaturës.
Ai, gjithashtu, ka shtuar se qytetarët për momentin janë jashtë rrezikut për jetë dhe gjendja e tyre është stabile.