Ministria e Punëve të Brendshme e Kosovës ka bërë një ndryshim në masën e sigurisë për produktet që hyjnë nga Serbia përmes pikës kufitare Merdar, konfirmoi Kryeministri Albin Kurti.
Kurti sqaroi se masa e sigurisë është ndryshuar nga kufizimi në kontroll të shtuar.
“Sot paradite Ministri i Punëve të Brendshme i ka shkruar drejtorit të Doganës që në njërën nga pikat kufitare me Serbinë, Kosova e ka ndërruar shuar masën e sigurisë. Nga kufizimi te kontrolli i shtuar. Deri të na vijnë skanerët. Në momentin kur na vijnë skanerët, sa të vendosen në të gjitha kufitare, deri atëherë ne do të hapin një pikë kufitare, e cila do të ketë kontrollin e shtuar për shkak se masat që i kemi ne janë të sigurisë dhe në 7 ditët në vijim i kemi dy zhvillime të rëndësishme. Pasnesër është mbledhja e CEFTA-s, ndërkaq sot një javë është samiti i Procesit të Berlinit. Ku presim të kalohet nga CEFTA në CRM apo tregun përbashkët rajonal”, ka thënë Kurti.
“Jemi përcaktuar për Merdarin sepse aty kufiri është i gjerë dhe terminali doganor është afër… Në CEFTA pres që të përfaqësohemi me Kosovë”, ka shtuar Kurti.