Në Shqipëri është duke u biseduar se kush do të jetë presidenti i ri vendit, por opozita dhe pozita nuk kanë arritur ta gjejnë një emër të përshtatshëm për të dyja palët.
Të dielën e 22 majit nuk është dorëzuar as një emër për president nga asnjëra palë. Afati kishte qenë deri në ora 16:00 për ta dorëzuar një emër për të parin e vendit.
Ndërsa të hënën e 23 majit, do të mbahet formalisht seanca plenare në orën 18:00, e cila do të ketë të njëjtin fat si ajo e kaluara, e cila dështoi pa asnjë kandidaturë.
Palët, në mesin e javës së kaluar ishin dakorduar që t’i lënë opozitës të drejtën për të propozuar e para kandidatin. Por, marrëveshja nuk shkoi si duhet, pasi kreu i grupit parlamentar të PD-së Enkelejd Alibeaj, akuzoi socialistët për prishje të saj.
Sipas Kushtetutës së Shqipërisë, kandidati për president i propozohet Kuvendit nga një grup prej jo më pak se 20 deputetësh.
Për zgjedhjen e presidentit të vendit, Kuvendi zhvillon deri në pesë votime (raunde). Presidenti zgjidhet në votimin e parë, të dytë ose të tretë, kur një kandidat merr jo më pak se tri të pestat e votave (84 vota) të të gjithë anëtarëve të Kuvendit, ndërsa Kuvendi i Shqipërisë ka 140 deputetë.
Në votimin e katërt dhe të pestë zgjidhet president kandidati që siguron më shumë se gjysmën e votave të të gjithë anëtarëve të Kuvendit. Votimi i pestë zhvillohet kur në votimin e katërt asnjë kandidat nuk ka siguruar shumicën e kërkuar të votave
Ndërsa, më 16 maj kishte dështuar raundi i parë për zgjedhjen e Presidentit, pasi nuk kishte pasur asnjë kandidatë zyrtar nga grupet parlamentare të Kuvendit të Shqipërisë, të cilat nuk e kishin dorëzuar kandidatura.