Sulmuesi i Kosovës, Edon Zhegrova, është shumë pranë kalimit te klubi i Juventusit në Serinë A. Mediat italiane raportojnë se 25-vjeçari ka arritur një akord personal me “Zonjën e Vjetër”, duke pranuar një kontratë 5-vjeçare me pagë 2.5 milionë euro në sezon plus bonuse.
Aktualisht, Zhegrova është pjesë e klubit francez Lille, me të cilin i ka mbetur vetëm një vit kontratë. Situata kontraktuale dhe dëshira e lojtarit për t’u transferuar në Torino e detyron klubin francez të ulë pretendimet financiare.
Fillimisht, Lille kërkonte rreth 25 milionë euro për kartonin e tij, por tani marrëveshja mund të mbyllet me një shifër që shkon deri në 20 milionë euro.
Zhegrova ka qenë ndër lojtarët më të spikatur të Kosovës dhe Ligue 1 në sezonin e fundit, ndërsa kalimi i tij te Juventusi pritet të zyrtarizohet së shpejti, duke e bërë atë një nga afrimet kryesore të bardhezinjve për këtë merkato.