Nga Haga, për më shumë se dy vite, një grua kishte bartur piktura në drejtim të Prishtinës.
Autori i tyre është Rexhep Selimi, që gjatë luftës ishte shef i Drejtorisë Operative të UÇK-së, ndërsa tani ndodhet në paraburgim nën akuzat për krime lufte, bashkë me Hashim Thaçin, Kadri Veselin e Jakup Krasniqin.
110 prej tyre, si simbolikë për shënimin e 110 vjetorit të pavarëisë së Shqipërisë, këtë të premte u ekspozuan në Muzeun Kombëtar.
E ajo që i kishte bartur pikturat nga Holanda, ishte gruaja e tij, deputetja Shqipe Selimi.
“Kur kam shku për vizitë për cdo muaj I kam dërgu pikturat, pëlhurat e papikturuara ndërkohë i kam marr të pikturuara dhe muaj pas muaji u bënë disa vepra të bukura arti”, ka thënë Shqipe Selimi.
Motivet kombëtare tek pikturat nuk mungojnë, por se çka i bënë të veçanta pikturat, foli edhe zëvendëskryeministri Besnik Bislimi.
“Shumica e këtyre nuk janë piktura të nivelit të fantazisë por janë shumica realiste. Për shembull, nëse e vëreni atje ai pikturon gjanat reale ato çka i sheh përpara ndërsa kjo pjesa këtu janë kryesisht me motive kombëtare dhe simetria me të cilën punon Rexha është unike”, ka thënë Bislimi.
Në hapje të ekspozitës ka qenë edhe kryetari i Kuvendit, Glauk Konjufca, i cili edhe e kishte vizituar Selimin dhe të tjerët në Hagë, e të cilët, sipas tij po mbahen padrejtësisht në Hagë.
Konjufca ka thënë se është e padrejtë mbajtja në paraburgim e ish krerëve të UÇK-së.
“Po quhet një proces gjyqësor por gjykimi nuk ka filluar ende, u zgjatë shumë me të vërtet, unë e kam shprehur shqetësimin dhe pakënaqësinë time pse kjo po ndodh, kanë kaluar më shumë se 2 vite dhe nuk po fillon gjykimi, është e pashpjegueshme dhe e padrejtë të njëjtën kohë sepse unë mendoj që po shkelen të drejtat e njeriut, të tyre”, tha kryetari i Kuvendit.
Selimi, ish deputet i Kuvendit të Kosovës, përveç pikturave, ka shkruar edhe disa tekste këngësh gjatë kohës sa po mbahet në paraburgim.
Ekspozita “Në garë me botën gri”, do të qëndrojë e hapur deri më 4 dhjetor.