Presidenti turk, Recep Tayyip Erdogan, ka thënë se Turqia mund ta bllokojë ende anëtarësimin e Suedisë dhe Finlandës në NATO, në qoftë se të dy vendet nuk ndërmarrin hapa që i përmbushin kërkesat e sigurisë së Ankarasë.
Turqia gjatë muajit të kaluar hoqi kundërshtimin për anëtarësimin e Suedisë dhe Finlandës në NATO por, kishte paralajmëruar se nëse këto dy vende nuk arrijnë që të ekstradojnë të dyshuarit që kanë lidhje me grupet e jashtëligjshme kurde ose, rrjetin e një klëriku të mërguar që akuzohet për okrestrimin e një grushti të dështuar në vitin 2016-të, do ta bllokonte këtë proces.
Pranimi i vendeve nordike duhet të miratohet nga parlamentet e 30 anëtarëve të NATO-s, dhe Turqia mund ta refuzojë këtë marrëveshje.
“Dëshiroj të kujtoj edhe një herë se nëse këto vende nuk ndërmarrin hapat e nevojshëm për të përmbushur kushtet tona, ne do të ngrijmë procesin,”ka thënë Erdogan në një fjalim televiziv pas një takimi të kabinetit. “Qëndrimi ynë për këtë çështje është shumë i qartë. Pjesa tjetër u takon atyre,” ka shtuar i pari i Turqisë.
Sipas Erdogan, Suedia nuk po “projektonte një imazh të mirë.” Reagime nga Finlanda dhe Suedia nuk ka pasur por, shteti turk po akuzon të dyja vendet duke i cilësuar si të butë ndaj grupeve që konsiderohen si kërcënime të sigurisë kombëtare.