I dërguari i Shteteve të Bashkuara të Amerikës për Ballkanin Perëndimor, Gabriel Escobar, ka thënë se fokusi në dialogun Kosovë-Serbi mbetet te finalizimi i marrëveshjes.
Gjersa po qëndron në Ohër të Maqedonisë me rastin e fazës tjetër të dialogut Kosovë-Serbi, Eascobar ka thënë se shpreson të arrihet një aneks i finalizuar për një marrëveshje për normalizim sot.
‘Unë shpresoj se do të arrijmë një aneks të finalizuar për një marrëveshje për normalizim sot”, ka deklaruar ai për REL, gjersa ka theksuar se “ne nuk jemi të fokusuar në nënshkrim, por po fokusohemi në finalizim. Kjo do të thotë të kemi një pajtim që të dyja vendet të përgatiten për diskutime reale dhe një pajtim real në marrëdhënien e tyre. Kështu që, kjo është më e rëndësishme: finalizimi i aneksit”.
Ndër të tjera, ai ka thënë se nuk ka rrugë drejt Evropës pa njohjen reciproke në mes dy vendeve.
“Mirë, mendoj se duhet të ndodhë. Mendoj se duhet të ndodhë për të gjitha vendet e rajonit. Kështu që, unë mendoj se nuk ka asnjë mënyrë, asnjë rrugë për në Evropë pa e njohur njëra-tjetrën të gjitha vendet e rajonit – që ta njohin njëra-tjetrën – dhe pa punuar mirë së bashku me njëra-tjetrën.”, ka deklaruar ai.
Ndërmjetësues të takimit Kurti-Vuçiq janë shefi i politikës së jashtme të Bashkimit Evropian, Josep Borrell, dhe i dërguari i posaçëm i BE-së për dialogun Kosovë-Serbi, Mirosllav Lajçak.