Të hënën e 25 korrikut, Fondacioni për të Drejtat e Kafshëve(FDK), ka bërë të ditur se kanë arritur marrëveshje me Komunën e Prishtinës, për të mbikëqyrur popullsinë e qenve endacakë në kryeqytetin e Kosovës.
Tutje ata kanë thënë se do ta mbështesin Komunën e Prishtinës për ta zgjidhur çështjen e qenve endacakë në mënyrë të qëndrueshme dhe humane.
“Organizata jonë do të jetë afër Komunës për ta mbështetur në përgjithësi rreth menaxhimit të popullsisë së qenve në Prishtinë, bazuar në frymën e Strategjisë Kombëtare që është duke u finalizuar nga niveli qendror (MAPL)”, thuhet në njoftimin e tyre në Facebook.
Sipas FDK-së, Komuna e Prishtinës është një nga komunat më aktive sa i përket projekteve të trajtimit të qenve në rrugë.
Por nuk mjafton vetëm kjo pasi sipas FDK-së “situata me qentë në rrugë nuk mund të zgjidhet nëse nuk trajtohet burimi i problemit nga të gjitha komunat njëkohësisht dhe nëse nuk punohet seriozisht dhe në mënyrë transparente për reduktim human të numrit të qenve në rrugë”.
Ndërsa këta qenë që do të trajtohen në mënyrë “sipas metodave profesionale të propozuara nga ICAM Coalition”.
FDK-ja, kanë përfunduar duke falënderuar Komunën e Prishtinës, dhe duke theksuar se FDK-ja “do të monitorojë çdo proces dhe masë të zbatuar nga komuna për këtë qëllim, në mënyrë që të sigurohet një trajtim profesional, llogaridhënës dhe human për qentë, të cilët edhe vet janë viktima të sjelljeve të pandërgjegjshme njerëzore, siç janë ndarja e këlyshëve nga nëna në moshë tepër të hershme dhe braktisja e tyre, mungesa e trajtimeve veterinare, keqtrajtimi etj”.
Pas nënshkrim të këtij memorandumi, asnjë kosto financiare nuk iu ngarkohet palëve.